திருக்குறள் உரை

எல்லோரையும் போலவே திருக்குறள் எனக்கு அறிமுகமானது மனப்பாடச் செய்யுளாகத்தான். குறைந்த அடிகளில் நிறைந்த மதிப்பெண் தரும் ஒரு சாதனமாகவே அது இருந்தது. குறளிலிருந்து அதிகாரத்திற்குச் செல்லவே பல வருட பள்ளிப் படிப்பு தேவைப்பட்டது. யோசித்துப் பார்க்கையில் குறள் எப்போது தனித்துவமிக்க ஒன்றாகவும் ஒப்பற்றதாகவும் தோன்றியது என்பது நினைவில் இல்லை. குறளிலில்லாதது என ஏதுமில்லை என்று அறிந்த போதுதான் அதன் முழுமையான சிறப்பும் ஆழமும் தெரியத் தொடங்கியது என நினைக்கிறேன். 

குறளில் என்னை வெகுவாகக் கவர்ந்த அம்சம் என்னவெனில், முதல் மூன்று சீர்களில் ஒரு கருத்தைச் சொல்லும் வள்ளுவர் நான்காவது சீரில் ஒரு கேள்வியைத் தொடுப்பார். பிறகு அடுத்து வரும் மூன்று சீர்களில் கேள்விக்கான பதிலைச் சொல்லுவார். இது அவரின் பெரும்பாலான குறள்களில் காணக் கிடக்கும் ஓர் அரிய அம்சமாக எனக்குத் தோன்றியது. அடுத்து முக்கியமான ஒரு சிறப்பு குறளின் ஓசை நயம். எல்லாக் குறள்களுமே ஓசை நயம் கொண்டவைதான். எதுகை மோனையினூடே அந்த ஓசை நயத்தை வள்ளுவர் திறம்படக் கையாண்டிருப்பார். குறளின் அடுத்த பெருஞ்சிறப்பு அதன் ஆழம். இரண்டடிகளில் அவர் பொதிந்து வைத்திருக்கும் விசயங்கள் எண்ணற்றவை. பல இடங்களில் அந்த ஆழம் நுட்பமாக வெளிப்பட்டு நம்மை அதிசயிக்க வைக்கும். ஆக இவையெல்லாம் குறளின் மீது எனக்கு ஈடுபாடு தோன்றக் காரணங்கள் என்று சொல்லலாம். 

குறளுக்கு எத்தனையோ ஜாம்பவான்கள் உரை எழுதியிருக்கிறார்கள். அவர்கள் சாதிக்காத எதையும் நான் சாதித்துவிடப் போவதில்லை. மாறாக குறளின் மீது கொண்ட காதலின் காரணமாகவே இந்த உரையை எழுத விருப்பம் கொண்டேன். மற்றபடி நான் குறளில் புலமையும் பாண்டித்யமும் பெற்றவன் அல்ல. குறளை நேசிக்கும் ஒரு சாதாரண வாசகன் என்ற நிலையிலேயே இந்த உரையை எழுதியிருக்கிறேன். குறளைப் போன்றே இரண்டடிகளில் எழுதியிருக்கிறேன். வேண்டுமிடங்களில் குறளின் வார்த்தைகளையே தக்கவைத்துமிருக்கிறேன். 

இதை எழுதும் பொருட்டு அனைத்துக் குறள்களையும் வாசிக்க நேர்ந்தது ஓர் அற்புதமான அனுபவம். அந்த அனுபவம் தந்த பாடம், குறள் இந்த உலகம் உள்ளளவும் நிலைத்திருக்கும் என்பதில் சந்தேகமில்லை என்பதே. 

இந்தப் புத்தகம் டிசம்பர் இறுதி அல்லது ஜனவரி முதல் வாரத்தில் தயாராகிவிடும். வழக்கம் போல அமேசானில் வெளியிட உத்தேசம். பதிப்பகம் ஏதேனும் கிடைப்பின் இங்கேயே வெளியிடவும் நேரலாம்.

Related Posts Plugin for WordPress, Blogger...