September 4, 2016

Habibi: சித்திரங்களினூடே ஓர் அற்புதப் பயணம்!

தற்போது நான் வாசித்து முடித்த ஒரு புத்கதம் Craig Thompson-ன் கைவண்ணத்தில் வெளியான Habibi என்ற கிராஃபிக் நாவல். அரேபிய நாட்டுப் பின்னனியில், குரான் கதைகளோடு இணைத்து பின்னப்பட்ட 670 பக்கங்கள் கொண்ட நாவல் இது. புத்தகம் முழுக்க இடம்பெற்றிருக்கும் கருப்பு-வெள்ளை ஒவியங்கள் அபாரமானவை. எத்தனை எத்தனை கதாபாத்திரங்கள் அவரவர்க்கே உரிய உருவங்களோடும், குணங்களோடும் புத்தகத்தின் பரவலான பக்கங்களில் வலம் வருகிறார்கள்! அவர்கள் அனைவரையும் நிஜம் போலவே நம் கண் முன்னே நடமாடவிட்டிருக்கும் Craig Thompson-ன் அபாரமான கற்பனைத் திறனுக்கும் ஒவியத்திறனுக்கும் ஒரு சபாஷ் போடலாம்.

வாசிக்கவாசிக்க மிகப்பெரிய கற்பனை உலகம் நம்முன்னே விரிகிறது. நகரத்தின் பிரம்மாண்டமான சித்தரிப்புகள் அந்த நகரத்தில் நாமே வாழ்ந்ததைப் போன்ற உணர்வைத் தருகிறது. காட்சிகளுக்கேற்ப ஒவ்வொரு கதாபாத்திரத்தின் முகபாவங்கள் வெளிப்படும் பாங்கு வாசிப்பின் இன்பத்தைப் பன்மடங்காக பெருக்குகிறது. வெறும் கோடுகளில் இந்த மாயத்தை Craig Thompson நிகழ்த்துகிறார். இந்தப் புத்தகத்தை வாசிப்பது ஒர் அற்புதமான அனுபவம் என்றாலும் இந்த நூல் சிறுவர்களுக்கானது அல்ல, முழுக்க முழுக்க பெரியவர்களுக்கானது.



சில புத்தகங்கள் வாசிக்கத் தொடங்கியதும் அலுப்பும் ஆயாசமும் தோன்ற எப்போது முடியும் என்று சலிப்பு ஏற்பட்டுவிடும். ஆனால் இந்தப் புத்தகம் வாசிப்பு முடிந்தும், இன்னும் தொடராதா என்ற ஏக்கத்தையே ஏற்படுத்துகிறது. எப்போதும் ஒரே மாதிரியான புத்தகங்களை வாசித்து வாசித்து அயர்ச்சி ஏற்படுவதற்கு மாற்றாக இத்தகைய புத்தகங்களை ஒருமுறை வாசித்துத்தான் பாருங்களேன்.

Related Posts Plugin for WordPress, Blogger...