August 24, 2016

MAUS (GRAPHIC NOVEL): சித்திரம் பேசுதடி!


தற்போது படித்து முடித்த ஒர் அதிசயமான அற்புதம் மவுஸ் என்கிற படக்கதை புத்தகம். என்னவொரு படைப்பு! சித்திரத்தின் கைவண்ணத்தில் ஹிட்லர் காலத்து யூதர்களின் வாழ்க்கையை மிக அற்புதமாக சித்தரிக்கிறது இந்தப் புத்தகம். கருப்பு-வெள்ளையில் சுமார் 300 பக்கங்கள் உள்ள புத்தகத்தை நான் அசிரத்தையுடனே வாசிக்கத் தொடங்கினேன். ஆனால் படிக்கப் படிக்க கதையும், அதன் கதாபாத்திரங்களும் உள்ளிழுத்துக்கொள்ள வாசிப்பில் இதுவரை இல்லாத வித்தியாசமான அனுபவத்தைப் பெற்றேன். என்ன வெறும் படக்கதைதானே எனும் எளிமைப் படுத்துதலையும், உதாசீனத்தையும் முற்றாக களைந்து தூர வீசியது இந்தப் புத்தகம். உண்மையில் ஒரு நல்ல புத்தகம் என்பது எந்த வடிவத்தில் இருந்தாலும் அது நல்ல புத்தகமே என்ற புரிதலை இந்தப் புத்தகம் ஏற்படுத்தியது.

இந்தப் புத்தகத்தை வாங்கும்போது எனக்குள்ளிருந்த முதல் தயக்கம் எலிகள் பேசும் ஒரு புத்தகம் என்பதுதான். வாசித்தபோதே எலிகள் என்பது ஒரு போர்வைதான் என்பது விளங்க, ஆசிரியர் மனிதர்களை எலிகளாக சித்தரிக்க வேண்டிய அவசியத்தையும் அறிய முடிந்தது. உயிர் என்பது அனைத்து உயிரினங்களுக்கும் ஒன்றுதான். அதில் மேலானது என்றோ கீழானது என்றோ ஏதுமில்லைதான். ஆனால் மனிதர்களாகி நாம் நம்மைவிட மற்ற உயிர்களை கீழாகவே மதிக்கும் மனோபாவம் கொண்டிருக்கிறோம். மனிதர்களை எலிகளைப்போல நடத்தியதோடு அவர்களை கொன்று குவித்தான் ஹிட்லர் என்பதை வெளிப்படுத்தவே ஆசிரியர் யூதர்களை எலிகளாக, ஜெர்மானியர்களை பூனைகளாக சித்தரித்திருக்க வேண்டியிருந்திருக்கிறது.


Art Spiegelman கதையை கட்டமைத்திருக்கும் விதம் அலாதியானது. தந்தையின் நினைவுகளை தனயன் படக்கதையாக எழுதுகிறான் என்பதனூடே கடந்த காலமும் நிகழ்காலமும் கதையில் ஊடாடி வருகிறது. ஒரு நாவலுக்குண்டான அம்சத்தை படக்கதையில் மிக அற்புதமாக வெளிப்படுத்தியதன் வாயிலாக ஒர் சிறந்த ஓவியராக மட்டுமின்றி சிறந்ததொரு கதைசொல்லியாகவும் தன்னை நிறுவிக் கொண்டுள்ளார் Art Spiegelman. அவரது கைவண்ணத்தில் படங்களோடு கதையும் இணைந்து ஓர் ஒப்பற்ற அனுபவத்தை மவுஸ் தருகிறது. அந்த அனுபவத்தின் அலாதியான உணர்வை நினைந்து நினைந்து வியக்காதிருக்க முடியவில்லை. IT IS JUST A FANTASTIC EXPERIENCE!

“சித்திரம் பேசுதடி என் சிந்தை மயங்குதடி” என்ற அழகான திரை இசைப்பாடல் நினைவுக்கு வருகிறது. அந்த பாடலின் குழைவு நெகிழ்வினூடே அளவற்ற சோகம் நிறைந்திருப்பது போலே இந்தப் புத்தகத்தின் சித்திரங்களின் ஊடே ஓர் இனத்தின் அளவற்ற சோகம் நிறைந்திருக்கிறது. கல்லிலே சிற்பங்களை செதுக்குவது போன்று காகிதத்திலே சித்திரங்களை செதுக்கியிருக்கிறார் ஆசிரியர். நான் இதுவரை எத்தனையோ புத்தகங்களை வாசித்திருக்கிறேன் பின்னர் மறந்துமிருக்கிறேன். ஆனால் இந்தப் புத்தகத்தை என்றென்றும் மறக்க முடியாதவாறு செய்துவிட்ட Art Spiegelman அவரது படைப்பாற்றலின் முன் நான் தலைவணங்கி நிற்கிறேன். வாசிப்பில் தவறவிடக்கூடாத புத்தகம் இது என்று உறுதியாகச் சொல்லலாம்.

Related Posts Plugin for WordPress, Blogger...